Хөл хорионоос зугтсан эр гурван цагдаа, хоёр эмч, нэг нууц амрагтаа коронавирус халдаажээ

Та Like дарвал мэдээ гарна.

Орост коронавирусээр өвчилсөн хүмүүсийн олонх нь утсан дээр нь алхам бүрийг нь хянадаг цэс суулгасан гэж гомдол мэдүүлж байгаа юм. Хэрвээ энэ цэсийг суулгуулаад дэглэм зөрчсөн тохиолдолд торгууль хүлээлгэдэг байна.

Тэгвэл энэ цэсийг суулгуулаагүй халдвартай эр олон хүнд халдвар дамжуулсан нэгэн тохиолдол гарсныг хүргэе.

Москвад нэгэн эр коронавирусийн халдвар авчээ. Ингээд хөл хорионд гэртээ суухын оронд өвөг дээдсийнхээ нутаг болох төрөлх хот руугаа зугтсан байна. Түүний хувьд гүйж харайж, амьдралын баясгаланг мэдрэх хэмжээний хөнгөн өвдсөн байсан гэнэ. Төрсөн хотдоо очмогцоо амрагтайгаа уулзаж амжжээ. Тэгээд сайхан бүсгүйн царайг хараад удаан суух нь уйтгартай санагдсан болохоор найз нөхдөө ч дуудан авчирчээ.

Найзуудаас нь гурав нь ирээд тэврэлдэж, ууж идэж, ярианы сэдэв нь хальтираад нэг л мэдэхэд COVID-19 өвчний тухай яриа болон хувирсан юмсанж. Тэгтэл өнөөх оргуул босгуул нөхөр “Би бас наад халдварыг чинь аваад золтой л түгжигдсэнгүй. Арайхийн та нар дээрээ ирлээ” гээд ам алдчихжээ.

Үүнийг сонссон найзууд нь маш ихээр уурлаж, согтуугийн гайгаар түүнийг зодож, хавиргыг нь хүртэл хугалж орхив. Бөөн зодоон нүдээн, чарлааныг тэвчээгүй хөрш нь цагдаа руу утасдаж, хэсгийн хоёр цагдаа машинаа орилуулсаар иржээ. Цагдаа нар бүгдийг нь фургондоо чихэж аваад хэсэгтээ аваачиж, өнөөх эрийг яагаад зодсон болохыг байцааж гарав.

Найзууд нь түүнийг Москвагаас COVID-19-ийн халдвар аваад ирсэн, бидэнд халдвар тараачихлаа гээд л дор бүрнээ үглэж дуулжээ. Үүнийг сонссон цагдаа нар ч ухаан алдах дөхөж, өнөөх эрийг нэмж зодоод, эрүүг нь хугалж орхив. Тэгснээ тэд түргэн тусламж дуудаж, эмч нар ч хурдаараа иржээ.

Түргэний эмч нар юу болсныг асуутал “Энэ тэнэг Москвагаас COVID чирээд иржээ” гээд л үглэсэн байна. Сандарсан эмч нар яагаад коронавирустэй гэж түрүүлж хэлээгүй юм бэ, бид хамгаалалтын хувцасгүй явж байгаа шүү дээ гээд л шогширч иржээ.

Ингээд оргуул босгуул эрийг архи хамт уусан найзууд, цагдаа нар, эмч нарынх нь хамт бүгдийг нь ачиж аваад, дээр нь амраг бүсгүй, бас хэд хэдэн хүнийг нэмээд тусгаарлалтад оруулсан байна. Тэд бараг бүгдээрээ коронавирусийн халдвар авснаас хоёрынх нь биеийн байдал хүнд байна.

Коронавирусийн халдвартай эрийн утсанд цэс суулгаж амжаагүй байжээ. Хэрвээ амжсан бол ингэж нэг хот, олон хүн халдвар авахгүй байсан биз ээ.

Эх сурвалж: www.kp.ru

Орчуулсан Э.МАРТ